संक्रमण देखिएमा विद्यालय एक हप्ता बन्द गरि वैकल्पिक माध्यमबाट शिक्षण सिकाइ गर्न काठमाडौं महानगरको निर्देशन

No Images Found

काठमाडौंः काठमाडौं महानगरपालिकाले विद्यार्थी वा शिक्षकमा कोरोना भाइरस संक्रमण देखिए मात्र महानगर क्षेत्रभित्रका विद्यालय बन्द गर्ने निर्देशन दिएको छ ।

महानगरले शुक्रबार महानगरभित्र सञ्‍चालित सबै विद्यालयहरुलाई पत्राचार गर्दै यस्तो निर्देशन दिएको हो।

महानगर क्षेत्रका विद्यालयहरूलाई गरिएको पत्राचारमा प्रमुख स्तरको बिहीबार गरिएको निर्णय अनुसार कोभिड(१९ संक्रमणको बढ्दो क्रम देखिएकाले कुनै विद्यालयका शिक्षक, विद्यार्थी वा कर्मचारीमा कोरोना संक्रमण भएको पाइएमा उक्त विद्यालय अर्को सूचना नभएसम्म कम्तीमा एक हप्ता बन्द गरी वैकल्पिक माध्यमबाट शिक्षण सिकाइ गर्न गराउनु भनिएको छ ।

महानगरले विद्यालयहरूमा सामाजिक दूरी कायम गर्ने, मास्क अनिवार्य प्रयोग गर्ने तथा साबुन पानीले राम्रोसँग हात धुने र सेनिटाइजरको प्रयोग गर्नेलगायतका स्वास्थ्य तथा जनसंख्या मन्त्रलयबाट विगतमा जारी गरिएका मापदण्डहरुको कडाइका साथ पालना गरी अभिभावकहरु समेतको सहमतिमा विद्यालय सञ्चालन गर्नु र गराउन हुन पनि अनुरोध गरेको छ ।