उच्चतम बिन्दुबाट फर्कियो नेप्से परिसूचक

No Images Found

काठमाडौंः कारोबार साताको पहिलो दिन सेयर बजार परिसूचक नेप्से उच्च बिन्दुबाट तल झरेको छ ।

यस अघि गत बिहीबार नेप्से परिसूचक हालसम्मै उच्च विन्दुमा पुगेर नयाँ रेकर्ड राखेको थियो । आइतबार सेयर कारोबार मापक नेप्से परिसूचक ३५ दशमलव ८९ अंकले घटेर २ हजार ६ सय ९९ दशमलव ५१ अंकमा झरेको छ । उता ‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पनि ६ दशमलव २९ अंकले घटेको छ ।

कारोबार रकम ८ अर्ब ८० करोड भन्दा धेरै भएको छ । नेप्सेमा कारोबार हुने म्युचुअल फण्ड बाहेकका सबै समूहका सबइन्डेक्सहरु घटेका छन् । कारोबार सेयर संख्याका आधारमा पहिलो नम्बरमा एभरेष्ट बैंक देखिएको छ । ८ सय ११ रुपैयाँ प्रतिकित्ता सेयर मूल्य रहेको एभरेष्टको १० लाख ८६ हजार ५ सय कित्ता सेयर किनबेच भएको छ । ब्रोकर नम्बर ५८ बाट एभरेष्टको धेरै कारोबार भएको देखिएको छ ।

यसैगरी कामना सेवा विकास बैंक, नेपाल क्रेडिट एण्ड कमर्श बैंक तथा नेपाल इन्फ्रास्ट्रक्चर बैंक, गरिमा विकास बैंक, कुमारी बैंक तथा ग्लोबल आइएमई बैंक पनि कारोबार सेयर संख्याका आधारमा अगाडि देखिएका छन् ।