सप्तरीमा जिता नदीको बाढीले झन्डै दुई सय घर डुबानमा

No Images Found

सप्तरी : रिन्तर अबिरल वर्षाका कारण जिता नदीको धार भत्किँदा सप्तरीको राजविराज नगरपालिका १० कदमाहा टोलका झन्डै दुई सय घर डुबानमा परेका छन् । सोमवार (आज) बिहानदेखिको बाढीले कदमाहा बस्ती डुबानमा परेको हो ।

राजविराज नगरपालिका १० का वडाध्यक्ष सुशील दासका अनुसार घर–घरमा झन्डै चार/पाँच फीटसम्म पानी जमेको छ । यस्तै ठाडो खोलाका कारण राजविराज नगरपालिका १५ का केही घर डुबानमा परेका छन् ।

यसैबीच भत्किएको जिता धार निर्माणका लागि खटिसकिएको र बाढी पीडितको उद्धार, राहतका लागि आवश्यक पहल भइरहेको राजविराज नगरपालिकाका मेयर शम्भु यादवले जनाएका छन् ।

त्यस्तै लगातारको वर्षाका कारण हनुमाननगर कङ्कालिनी नगरपालिकाको वडा नं ११, १२, १३ र १४ का केही घर डुबानमा परेका छन् । सप्तरीमा बर्सेनि विभिन्न खोला तथा नदीमा बाढी आए पनि यसबाट हुने क्षति कम गर्न अहिलेसम्म सम्बन्धित निकायले कुनै चासो नदेखाएको स्थानीयवासीको आरोप रहेको छ ।